मकवानपुर | राक्सिराङ क्षेत्रमा अहिले किसानहरू सरकारले गरिरहेको गाँजा फडानी अभियानप्रति कडा असन्तुष्टि जनाइरहेका छन् । स्थानीय किसानहरूले आफूहरूले गाँजा नशाको रूपमा होइन, जीविकोपार्जनको स्रोतका रूपमा लगाएको दाबी गर्दै सरकारको नीतिलाई “किसानमाथिको अन्याय” भनेका छन् ।
सरकारले खेतमा उम्रिएको गाँजाको बोट फडानी गरेपछि गाउँमा तनावपूर्ण अवस्था सिर्जना भएको छ । किसानहरूले भने, “हामी यो देशका मेरुदण्ड हौं, तर सरकारले हाम्रै मेरुदण्ड भाँचिदिएको छ ।”
किसानहरूको भनाइमा गाँजा खेती अपराध होइन, बरु अवसर हो । “हामीले गाँजा नशाका लागि होइन, पेट पाल्नका लागि लगाएका हौं,” एक किसानले भने, “भोकै बस्नु कानुनी हो र ?”
किसानहरूले सरकारसँग माग गरेका छन् —
गाँजा फडानी अभियान तुरुन्त रोकियोस्,
गाँजा खेतीलाई वैधानिकता दिई बजारको व्यवस्था गरियोस्,
स्थानीय किसानलाई वैकल्पिक रोजगारी वा उद्योगसँग जोडियोस् ।
त्यसैगरी किसानहरूले राक्सिराङ क्षेत्रबाट निर्वाचित जनप्रतिनिधिहरू— महेश बर्तौला (एमाले) र इन्द्रबहादुर बानियाँ (कांग्रेस)—प्रति पनि प्रश्न उठाएका छन् । “हिजो गरिब तामाङ र चेपाङ समुदायका जनताले भोट दिएर जिताएका नेताहरु अहिले चुप छन् । जनताको पसिना माथि प्रहरीले फडानी गरिरहेको बेला तिनीहरू कहाँ छन् ?” किसानहरूको प्रश्न छ ।
किसानहरूको भनाइमा, संसारका धेरै देशहरूले गाँजाबाट औषधि, तेल, वस्त्र र अन्य उद्योगमार्फत अरबौं आम्दानी गरिरहेका छन्, तर नेपालमा किसानको पसिनालाई अपराध ठहरिएको छ ।
“हामी अपराधी होइनौं,” किसानहरू भन्छन्, “हामीलाई प्रहरी होइन, नीति चाहियो; धम्की होइन, अधिकार चाहियो ।”
किसानहरूले चेतावनी दिएका छन् — “यदि सरकारले आवाज नसुनेमा गाउँ गाउँबाट आन्दोलन सुरु हुनेछ ।”
#गाँजालाई_बैधानिकता_दे
#गाँजा_फडानी_कार्य_बन्द_गर
#राक्सिराङ_अनलाइन
